موعود فيها - موسى زغيب موعود فيها صار إلي مدي ولما تلاقت يدها بيدي قلت بدي شكلك بالورد قالت أنا بالعكس ما بدي * * * * * فرشتلها ريش النعام تخوت وبودرتها بهبة نسيم الليل وجبتلها حبة من الياقوت كانت بمحبس عشتروت جبيل وقلتلها يا حاضري وغدي عفوك هدايا الحب لا تردي غطت زنود العاج بالديباج وقآلت إذا بتريد ما بدي * * * * * سحبت من عمر الزمن خيطان لونهن بلون شفافها الحمرا وطرزت فيهن قبة الفستان الرح تحترق من تلجة الجمرا وقلت لبسيهن والشمس حدي فزعان تكوي الشمس لمندي قالت ما فيها الشمس تكوي شمس وعن إذنك فساتين ما بدي * * * * * وليلة شربت السحر وتغيرت ودخلت غرفتها ورا الأحلام وقربت من صوب الفراش وصرت رش الغفى بعيونها تا تنام ونامت وحلمت حالها حدي وصارت تطبع جمر عا خدي وشو خفت يفلت من عيونها الحلم وتوعى الصبح وتقول ما بدي * * * * * ولما عرفت ما في أمل يحلى عنقودها فتشت عا أحلى ولم عرفت العصفورمنها طار من غير وعي من عيونها الكحلى من القهر نزلت دمعة الياريت تكوي الزرار بعروة المريول وصارت بعد ما تركتها وفليت تركض ورايي حافية وتقول دخلك غمرني وشدني بدي إغفى وأعمل زندك مخدي قلتلها سبحان الله كيف لما صار بدك ما بقا بدي